Гiсторыя

Ленінская сярэдняя школа стала пераемнікам установы адукацыі, якая ўзнікла на тэрыторыі нашага саўгаса ў вёсцы Дурынічы (цяпер в. Ізюмава) . У 1920 годзе пад кіраўніцтвам настаўніка Шычко Г.І. была арганізавана Будзёнаўская пачатковая школа, якая налічвала 31 вучня. У 1930 годзе школу дабудавалі, і ў ёй ужо налічвалася 5 класаў. Паступова школа пашыраецца, і ў даваенны час стала сямігодкай. Вайна. Настаўнікі ідуць на фронт.Толькі з 1944 года школа зноў дабудоўваецца і ў 1962 годзе становіцца васьмігодкай. У мікрараёне ўзнікаюць яшчэ 2 школы: Баярская і Сычкаўская.

26 студзеня 1971 года ў выніку няшчаснага выпадку будынак школы згарэў. Заняткі працягваліся ў арандаваных памяшканнях.

У верасні 1971 года пачалося будаўніцтва   новай тыпавой школы на 320 месцаў, у якой павінны былі пачацца заняткі ў верасні 1972 года. Дзякуючы дапамозе вучняў і бацькоў, школа адкрылася, праўда, ў лістападзе-снежні. Школа стала сярэдняй, пабудаваны інтэрнат, стадыён, створаны прышкольны ўчастак. З верасня 1971 года прызначаны першы дырэктар, які ўводзіў школу ў жыццё – Андрыенка Марыя Рыгораўна. У сценах светлай двухпавярховай дзесяцігодкі навучаецца па два – тры камплекты класаў. Першы выпуск 1973 года склаў 27 чалавек.

З 1974 па 1977г. школай кіруе Волкаў Уладзімір Ігаравіч, фізік па адукацыі

Доўгі час – 1977– 1984 гг. - Ленінскую сярэднюю школу ўзначальвае былы загадчак аддзела адукацыі Бабруйскага РАА Мікульскі Міхаіл Адамавіч.

З прыходам Валошына Івана Мікітавіча ў 1984 годзе побач са школай ствараецца Сад-помнік у памяць 40-годдзя Перамогі ў Вялікай Айчыннай вайне і ў памяць аб загіннуўшых аднавяскоўцах. Гэты сімвалічны помнік стаў месцам школьных лінеек, месцам гонару і смутку ў Дзень Перамогі. 

З 1986 па 1991 год школу ўзначальвае вопытны дырэктар Стэльмак Аляксей Міхайлавіч.

З 1991 года па 2017 год дырэктар школы - Танковіч Франц Іванавіч.

У сувязі з рэфармаваннем Ленiнская СШ аб’ядналась з Сычкаўскай БШ у 2004 годзе. Сучасная назва школы “Дзяржаўная установа адукацыі “Ленiнская СШ Бабруйскага раёна”.

З 2017 года і па гэты час школу ўзначальвае дырэктар Iваноўская Марына Пятроўна.

Сёння ў школе налічваецца 95 вучняў, 24 выхаванцы дашкольнай групы. У сувязі з пабудовай аграгарадка, у школе акрамя 12 вучэбных класаў, майстэрні, спартыўнай і актавай залы, сталовай, бібліятэкі, з’явіліся трэнажорная зала і новы камп’ютарны клас. У школе дзейнічаюць грамадскія арганізацы: БРПА, БРСМ, БМГАВП, арганізаваны гурткі і секцыі, музычная школа, студыя выяўленчага мастацтва.

Традыцыі школы 

Вучні школы – не толькі ўдзельнікі, але і ініцыятары школьных спраў. А іх у нас нямала.

• Непаўторнае 1-е верасня – Дзень ведаў.
• У Дзень нараджэння БРПА праводзяцца ўрачыстыя лінейкі, раённыя акцыі.
• Заўсёды яркі, кранальны і гумарыстычны Дзень настаўніка.
• Тыдзень малодшага школьніка – гэта тыдзень гумару, радасці, спорту, ведаў для кожнага – малодшых школьнікаў і піянераў.
• Навагодні ранішнік у дзіцячым садзе, для малодшых школьнікаў і вечар для старшакласнікаў – незабыўнае, доўгачаканае свята.
• Вечар сустрэчы выпускнікоў – вечар успамінаў усіх пакаленняў.
• Дзень дружыннага героя – 4 лютага – дзень нараджэння Героя Савецкага Саюза Мікалая Рыгоравіча Пінчука, лётчыка і земляка, аўтара кнігі “У паветры ЯКі” – ведае кожны школьнік.
• Урачыстая лінейка, прысвечаная Дню юнага – героя антыфашыста -- 8 лютага.
• Мужнасць, сіла і спрыт - атрыбуты сапраўдных мужчын, якія праяўляюцца на “Рыцарскім турніры” 23 лютага.
• Вельмі ж шырокая ў нас Масленіца са скамарохамі, Вясной, гульнямі, вогнішчам, пудзілам Зімы, катаннем на конях і, канешне, гарачымі блінамі.
• “Міс Дзюймовачка”, “Міс Пралесачка”, “Міс Вясняначка” ; “А ну-ка, матулечкі!”, “А ну-ка, бабулечкі!”, “А ну-ка, дзяўчаткі!” – вось далёка не поўны пералік гульняў і конкурсаў, прысвечаных 8 сакавіка.
• Самы, самы, самы смешны дзень – 1 красавіка.
• Дзень птушак, Дзень Зямлі, Тыдзень экалогіі, суботнік – справы красавіка.
• Збор металалому і макулатуры – штогодняе папаўненне школьнай скарбонкі.
• Вахта Памяці, Дзень Перамогі – самыя адказныя святы года, дні смутку і радасці, дні клопату і памяці.
• Дзень піянерскай дружбы – 19 мая – дзень дружбы дарослых і дзяцей.
• Апошні развітальны званок – закончаны апошні ўрок. Наперадзе доўгачаканае лета.